Corinne Cahen: aus dem Regierungsquartier an d’Märei?

0
752
image credits: vdl.lu

et war schonn erstaunlech! Grad a Corona-Zäiten huet sech d’Familljeministesch Corinne Cahen extreem an der Ëffentlechkeet zeréck gehalen. Just dat Noutwendegst! A si huet och meeschtens just dann eppes um Mikro gesot, wann si dozou opgeruff gouf. Absolutt net hire Genre! Dobäi feelt et der Persoun net um néidegen Ego, net um perséinlechen a politeschen Selbstbewosstsinn. Wat ass da lass?

dobäi hätt si genuch Geleegenheeten gehat, fir d’Wuert ze ergräifen. Als Familljeministesch hätt si de Leit kënnen d’Spillreegelen fir Doheem opzielen, sech permanent fir Persounen an Altersstrukturen asetzen. Als Ministesch fir d’Groussregioun hätt si kënnen, jo MUSSEN an d’Arena sprangen, fir sech iwwer de Quatsch vun den zouene Grenzen ze iergeren. Kuerz, si hätt et kënne maachen wéi quasi all déi aner Regierunsmemberen: et gëtt zwar net vill ze soen, ma et geet déck duer fir eng Pressekonferenz.

an normalen Zäiten hätt d’Madamm Cahen et och esou gemaach. PK, Communiqué, Fissellespill, fir esou dacks wéi méiglech an de Medien present ze sinn. Ma Corona-Zäiten sinn net normal. D’Krisebewältegung huet hir politesch Wonnen hannerlooss an enger Dräierkoalitioun, an där sech stänneg zerriwwe gëtt. D’Madamm Cahen huet d’Zäit genotzt, iwwer hir eegen Zukunft nozedenken; a si koum zu der Konklusioun: wa schonn net Kapitänin vun enger Regierung, da wéinstens Big Boss an der gréisster Märei vum Land. D’Corinne Cahen huet de Kompass Direktioun Knuedler gestallt!

bis dohinner bleiwen 3 Joer Zäit fir d’Weichen ze stellen. D’Corinne Cahen ass bekannt als fréier Geschäftsfra an huet sech hir éischt Stärercher als Presidentin vum Stater Geschäftsverband verdéngt. Et schwätzt also direkt näischt géint hir Kandidatur fir op de Stull vun der Buergermeeschtesch, wär do net d’Lydie Polfer. Si ass eng gefillten Eiwegkeet Cheftaine an der Märei, huet also an hirer politescher Valiss eng enorm Erfarung. A wat een esou héiert: d’Madamm Polfer ass net gewëllt, sech kal stellen ze loossen!

D’Lydie Polfer huet zu dësem Ablack ferrem wëlles, sech an dräi Joer nach emol dem Verdikt vum Wieler ze stellen. Si huet bis dohinner quasi hir 70, ma fillt sech geeschteg wéi kierperlech fit genuch fir 6 weider Joer um Knuedler. Wéilt si dat net maachen, misst si aus Anstand an den nächsten 12-15 Méint demissionéieren, fir esou hirem Nofolger déi néideg Zäit ze loossen, sech anzeschaffen. Iwwerleeungen an déi Richtung hunn ech allerdéngs nach ni héieren!

et kéim also op en Duell tëscht deenen zwou Fraen eraus, mat als Erausfuerderin d’Corinne Cahen. Et sief d’Partei wéilt d’Experienz vun der duebeler Spëtzt widderhuelen, wou an der Zäit den Duo Helminger – Polfer d’DP an d’Wahlcampagne geschleeft an d’Partei op eng staark Zerräissprouf gestallt hat. Déi Liberal solle roueg och hiert Laangzäitgediechtnëss benotzen: virun iwwer 25 Joer wollt sech den LSAP-Minister Robert Goebbels als Buergermeechter an der Haaptstad feiere loossen; um Wahlsonndeg gouf et kee Kaviar, dat sozialistescht Resultat war e Fiasko!

KOMMENTAAR

Please enter your comment!
Please enter your name here