Politmonitor: wéi wäit däerf de Chef vun engem Meenungsinstitut an der Ëffentlechkeet goen? 

Et hat sech an der Zäit erëmgeschwat. De Charel Margue, deemolege Chef vun der TNS-ILRES hat nawell e Pendant zu deene Gréngen. Dat war och en internen Thema bei RTL. Haut sëtzt de Mann fir déi Gréng an der Chamber, woumadder seng politesch Orientéierung jo däitlech confirméiert ass. De Charel Margue huet seng politesch Preferenzen allerdéngs verstoppt duerchblécke gelooss, sech bei Interpretatiounen vu politesche Sondagen verroden. Méi net!. Säin Nofollger bei TNS-ILRES trëppelt do aner Weeër.

Den Tommy Klein ass héich aktiv op Twitter. An dat wërft Froen op. Schliisslech mécht säi Betrib fir RTL a fir d’Lëtzebuerger Wort reegelméisseg politesch Ëmfroen, déi souwisou kontroverséiert sinn. Ass et also glécklech, wann de Chef vun engem Meenungsinstitut sech an déi politesch Diskussioun amëscht? E puer Beispiller:

De 17. November kënnt hien mat dësem Tweet:

Bon! Dat kann een nach witzeg ophuelen. Et gëtt sech eng Photo aus dem Lëtzebuerger Land geléint, fir dann en Text driwwer ze pechen mam Message: bei der CSV kritt de Wiseler kuerz virum Politmonitor weech Knéien. Allerdéngs handelt et sech beim Tweeter ëm de Chef vun engem Meenungsinstitut an normalerweis ass an der Halschecht vum November déi éischt Vague vun der Sonndesfro erlaanscht. Hat den Tommy Klein also zu deem Ablack schonn éischt Resultater ënner der Nues? Et koum dozou och e Rappell, déi Kéier gemënzt op eben grad d’Sonndesfro

Ënnendrënner nach ëmmer d’Photo vum Wiseler, deen do sëtzt ewéi e Strummert. Wien déi Tweeten all gesinn hat, konnt effektiv denken: et kënnegt sech en Debakel un fir déi Chrëschtlechsozial. D’Confirmatioun koum Stonnen drop mat engem däitleche Resultat: RTL huet gepusht a getwittert, den Tommy Klein huet dat weider getwittert

Also: bei der CSV maachen se laang Gesiichter, bei de Sozialisten breet Paangechlaachen. D’Resultat aus dem Sondage spillt hei keng Roll, dofir awer d’Roll vum Chef vun der Ëmfro. Den Tommy Klein huet och sos d’Politik kritesch kommentéiert an de Parteien den Dicks geriicht

D’CSV koum am Laf vun de leschte Wochen besonnesch dacks zu Tweet-Éieren

Dem Mann läit de Laurent Mosar um Mo. Do gëtt zum Beispill en Tweet vum Radio 100,7 gedeelt.

An och de François Bausch kritt säi Fett!

Feelt nach jst, datt de Mann Ponkte verdeelt!

Ech sinn dee Leschten, dee wéilt d’Meenungsfräiheet aschränken. Ma ech stelle mir an och Iech d’Fro: sollen net Manager vu groussen a mëttlere Betriber sech eng Eegendisziplinn operleeën, wat hiren Optrëtt grad an de soziale Medien ubelaangt? Kann zum Beispill en Direkter vun enger Bank d’Strategie vun der Stëmm vun der Strooss ëffentlech kommentéieren? Kann den Direkter vum Statec d’Sozialpolitik vun der Regierung kritizéieren? Kann, däerf de Chef vun der Lëtzebuerger Zentralbank de Spunnes dreiwen mat der ABBL? Oder de Chef vun enger Krankeversécherung, deen iwwer al Leit hierfält?

Et wier e Staminee op héijem Niveau. Interessante Beschass! Deen awer iergendwann eis Gesellschaft futti géing maachen! D’TNS-ILRES ass kee grousse Betrib, ma ass indirekt- nämlech via seng Sondagen- och e politesche Betrib. Héich sensibel! D’Resultater vu sengen Ëmfroen si souwisou kontestéiert. Et soll een si just als Trend gesinn deen allerdéngs scho muer e ganz anere ka sinn. D’Resultat vun der Ëmfro läit meeschtens eng gehéiereg Portioun wäit ewech vum Resultat vun de Wahlen.

Do wier et ubruecht als Direkter net nach d’Roll vun engem zousätzlechen troublemaker ze spillen. Et sief, et wéilt een sech de Virworf als influencer gefale loossen!