den CSV Parteipresident Frank Engel war gëschter Owend am KLOERTEXT op Tele Lëtzebuerg op d’mannst vun der Form hir de klore Gewënner. De Mann kann gutt schwätzen. Wat säin Inhalt zum Sujet Steiergerechtegkeet ugeet: kee Wuert méi iwwer Verméigens- oder Ierfschaftssteier, de Parteipresident gouf vu senger Fraktioun riicht gebéit. De President huet brav säi Parteiprogramm zitéiert, vu FiS geschwat a vu Stock Options, déi missten ofgeschaafen op d’mannst ëmgeännert ginn. No baussen: Frieden, Freude, Eierkuchen!
No bannen allerdéngs rumouert et tëscht Parteipresident a virop der Fraktioun weider. De Frank Engel huet gëschter d’Impressioun hannerlooss, wéi wann déi CSV-Propositiounen vun him déite kommen. Dat suergt fir Frustratiounen, besonnesch an der Fraktioun. Derbäi kënnt, datt den Engel Parteiintern eng aner Sprooch schwätzt ewéi no baussen, also sech weider fir d’Iddi vu Verméigens- an Ierfschaftssteier asetzt. Dat féiert zu enger allgemenger Veronsécherung ënnert de Militanten.
“…Den Haaptprobleem läit allerdéngs bei
Meenungsdivergenzen an der Regierung..!”
D’DP huet fir dee Kloertext hir Deputéiert Carole Hartmann an d’Arena geschéckt. Ouni där Fra – déi sech iwwregens guer net schlecht geschloen huet- wollen ze no ze trieden, mat de Parteipresident(inn)en, déi hier vis-à-vis souzen, konnt si net mathalen. D’Demokratesch Partei gouf domadder d’Signal eraus, datt de Sujet Steieren fir si zu dësem Ablack net wichteg genuch ass. Oder villäicht ze wichteg, well dorunner d’Koalitioun kéint an d’Bréch goen.
Rout a Gréng sinn nämlech fir eng Verméigenssteier, déi vun de Bloen gehaasst gëtt, wéi d’Kräiz vum Dracula. LSAP a Gréng hunn esouguer nach eng drop gesat an zwar eng hefteg: d’Bankgeheimnis misst och zu Lëtzebuerg ofgeschaafe ginn! Ech koum mir gëschter wéi op engem Basar vir: wee bitt méi?! D’Ofschaafen vum Bankgeheimnis wär tatsächlech mol eng Kéier e Paradigmewiessel. Rout a Gréng hunn déi Propositioun natierlech net (nëmmen) fir d’Galerie gemaach, ma fir weideren Drock op d’Haaptregierungspartei ze schafen.
D’Argumentatioun vun den zwee klenge Koalitionären steet op wackelege Féiss. D’Akommes – net d’Verméigen- vun deenen Décken ass bekannt: 2800 Stéit hunn en Akommes tëscht 250.000 a 500.000 Euro; 380 leien bei iwwert enger hallwer Millioun. 18000 Leit- an dat kéint dee berüümte Mëttelstandsbockel sinn, verdéngen tëscht 100.000 an 200.000 Euro; dës lescht Kategorie huet virun 5 Joer dem Pappa Staat 860 Milliounen u Steieren berappt.
