Et ass net ganz richteg, datt Projeten um Wunnengsmaart vu Flantermais, Schlaangen an Hecken dominéiert, dirigéiert ginn. Och d’Riichter wëllen e Wuert mat schwätzen. An esou gouf d’Prozedur ronderëm d’Virkafsrecht vun de Gemengen e Strapp méi komplizéiert, eigentlech zu enger Saach vun der Onméiglechkeet!
Deen droit de préemption gesouch bis ewell vir, datt de Propietaire vun engem gréisseren Terrain mat PAP – net fir en Eefamiljenhaus, ma fir eng substaniell Residenz drop ze bauen- prioritär ënner anerem huet mussen bei senger Gemeng passéieren, fir hir dat Grondstéck zum Verkaf unzebidden. D’Gemeng konnt guer net mat schwätzen wat de Präiss ubelaangt, konnt just e positiven oder negativen Avis ginn, d’Geschäft entweder fale loossen oder awer engkéier schlécken an de Bauterrain kafen.
Zanter dem pacte logement aus dem Joer 2008 gesäit d’Prozedur vir, datt de Schefferot den Dossier un en Notär weider gëtt, deen dann den Acte preparéiert. D’Geschäft gëtt duerno bannent zwee Méint vum Gemengerot duerchgewonk a kritt säi Stempel vum Inneministère.
zanter dem Verdikt vum Verwaltungsgeriicht vum leschten 21. Januar kritt déi Prozedur eng aner Nues. De Schefferot gëtt den Dossier eng éischte Kéier un de Gemengerot; wann deen dann averstaanen ass, geet d’Saach un den Notaire -deen och seng Zäitche brauch- an da kënnt de Verkaaf zeréck an de Gemengerot, wou schliisslech driwwer ofgestëmmt gëtt. An dat muss alles bannent zwee Méint geschéien!
Den Hoken bei der Saach ass, datt an den allermeeschte Gemengen de Conseil maximal eemol de Mont zesumme kënnt! Domatter gëtt fir si d’Virkafsrecht quasi onméiglech. Ganz dervunner ofgesinn, datt et Méint am Joer gëtt, wou de Conseil iwwerhaapt net zesumme kënnt, wéi zum Beispill am August. Den droit de préemption ass domadder zur Farce degradéiert! De Wee zu senger eegener Wunneng ze kommen, gëtt nach méi holpereg a laang!
virun allem a kommunalpolitesche Kreesser gëtt zanter Wochen doriwwer vill diskutéiert an de Kapp gerëselt. D’Wunnengsnout ass grouss a besonnesch d’Gemengen hunn do eng Schlësselroll ze spillen. Eis Haaptstad zum Beispill huet den Ament 621 sozial Wunnengen. Net schlecht, kéint awer nach besser sinn. Vum Knuedler héiert een, datt ee wollt nei Weeër goen, fir d’Offer ze vergréisseren. Mam Verdikt vum Verwaltunsggeriicht sinn de Gemengepolitiker zwar net d’Hänn komlett gebonnen, ma si kruten dach en onnéidege Klotz an de Wee gestallt.
Eigentlech Grond genuch fir e Gespréich tëscht dem neie Logementsminster Henri Kox an der Justizministesch Sam Tanson…
