Causa Schneider: Exklusiv-Interview mam Top-Affekot Emmanuel Marsigny 

De Frank Schneider – an engem fréiere Liewen Operatiounschef vum lëtzebuerger Geheimdéngscht- gouf bekanntlech virun 18 Méint vu franséische Gendaarmen heifir op der Grenz festgeholl. De Grond: hie gouf vun den amerikaneschen Autoritéite gesicht a sollt un d’Land vum Monni Sam ausgewise ginn fir do de Prozess gemaach ze kréien. Zanter 10 Méint sëtzt hien mat Foussfesselen bei sech doheem an engem Haus a Frankräich a waart, datt säi Schicksal e weidere Stouss kritt. An zwar vum lëtzebuerger Premier!

Deen awer wëll mordicus kee Fanger fir hien kromm maachen, an esou huet déi ganz Regierung zimmlech rezent betount, datt si sech net fir de Schneider wëll asetzen. Schonn éischter verwonnerlech, ëmsou méi wou d’Sozialisten – an de Jean Asselborn un der Spëtzt- wéinstens inoffiziell de Fall méi nuancéiert gesinn. De Schneider betount, onschëlleg ze sinn! Dat ass dat eent. Bon! Et muss een him dat net gleewen. Dat anert ass, datt de Mann op kee Fall wëll un d’Amerikaner ausgeliwwert ginn.

Déi amerikanesch Justiz ass nämlech alles aneschters ewéi demokratesch. Si kascht la peau des fesses, et kritt een d’Messer op d’Broscht gesat fir op guilty ze plädéieren a Schwupp, ass een fir 20 Joer hanner Gitter. Vun de Prisongen dohannen guer net ze schwätzen. De Schneider hätt also gären, datt hien net un d’AMI’s ausgeliwwert gëtt, wëll sech zugläich engem Prozess net entzéien, dann awer op lëtzebuerger Territoire.

Et goung an et geet ëm déi prinzipiell Fro: muss de lëtzebuerger Staat net fir d’Sécherheet vu senge Bierger opkommen? Muss d’Regierung – an dësem Fall de Regierungschef- net bei de Fransousen intervenéieren, fir de Mann zeréck an de Grand-Duché ze kréien?

Eis verschidden Autoritéiten awer hu sech déi lescht Méint just an eppes ervirgedoen: si hunn gutt Sëtzlieder! Nom Rezept aus “politesch kachen a brachen“: d’Saach aussëtzen, am Beschten näischt ënnerhuelen, mësch dech an näischt, da kënns du an näischt! Iergendwann wäert sech d’Nervositéit nees leeën, ëmsou méi wou déi groussherzoglech Press och net grad duerch Fläiss an der Saach opgefall ass.

Justiz a Politik hu sech de Ball géigesäiteg zeréckgeschoss, wéi eng waarm Gromper. Zanter e puer Wochen awer kënnt Musek an d’Spill, d’CSV – an iwwerhaapt déi gesamt Oppositioun- huet endlech de Sujet opgegraff. An och ëmmer méi Leit aus dem Vollek stellen sech hannert d’Persoun Schneider. Net wat seng Schold oder Onschold betrëfft, ma de Prinzip vun der Ausliwwerung vun engem Lëtzebuerger un d’Ausland, hei un d’USA. Et bleift ëmmer nach Zäit genuch duerno, fir festzestellen, ob hien net awer e korrupte Kärel ass.

De Frank Schneider huet den Ablack e puer Affekoten, een an de States, een a Frankräich an dat ass keen aneren ewéi den Emmanuel Marsigny. E Star-Affekot. De Mann plädéiert fir de fréiere franséische Premier Edouard Philippe deen sech am Kontext vun der Covid-19-Pandemie soll viru Geriicht veräntwerten, de Marsigny war den Affekot am Angolagate an och am Crash vun der Concorde. Elo dann de Verteideger vum Här Schneider! A mat deem Mann huet sech de Marc Thoma ënnerhalen.

De Marsigny kann de Raisonnement vum Xavier Bettel net novollzéien!