Op de Geriichter huet déi lescht 10 Deeg den Drama vu Lausduer dominéiert. Viru 4 Joer hat et jo op där Plaz eng course-poursuite vun der Police ginn. Déi Uniforméiert wollten engem verdächtegen Auto op der Wemperhaart hannendru fueren, kuerz drop- hanner Wäiswampech- koum et zu dem déidlechen Ongléck: d’Polizisten wollten mat hirem Auto d’Kéier maachen a goufen dobäi vun enger Polissecamionette gerammt, déi mat héijer Vitesse ënnerwee war.
E Polizist vun 39 Joer koum dobäi ëm d’Liewen, eng weiblech Kolleegin gouf schwéier blesséiert. E mënschlechen Drama bannent e puer Sekonnen! Wien ass schëlleg oder mat-schëlleg? De Verdikt fält eréischt am Hierscht.
De Marc Thoma huet sech op apart tv och fir dësen dach aussergewéinlechen Tëschefall interesséiert. Hien huet a sengem Reportage ënner anerem e längeren Interview mam Maître Trixi Lanners a mam Maître Dan Baulisch. Säi Reportage ass elo och op dëser Websäit ze gesinn.
