Beim Straubejitzer kritt ee munchmol Geschichten opgehaangen, do stinn engem d’Hoer zu Bierg. Net esou beim Pierrot am Rollengergronn. Mat 81 Joer schneit hien eemol wéi d’aner Kéier de Männer hiert Hoer, an dat schonn zanter 55 Joer. Seng Clientèle ass deementspriechend och net méi grad déi Jéngst. Säi Salon ass nach aus där Zäit, wou den 47 11 als gudde Parfum gegollen huet. An awer ass säi Salon eenzegaarteg.
Et brauch ee just duerch eng Dir ze goen a schonn ass een an engem Bistro. Do gesinn sech gutt Frënn. Eeler Hären, déi bei engem Patt iwwer den Härgott an d’Welt diskutéieren, och vill iwwer d’Politik. De Marc Thoma war bei hinne laanscht gefuer, bei de Coiffeur an dunn an de Café.
Déi eeler Hären weisen eis wéi et geet! Si hu politesch grouss Divergenzen, ma streiden sech ni dowéinst. Dofir ass d’Liewen hinnen ze schued. An esou kann duerchaus een iwwerzeegte Kommunist gudde Frënn sinn mat engem Paf….oder esou.
En interessanten Interview, feelt nach just den Don Camillo. Et kann een dem Marc säi Video och op apart.tv kucken an grad esou op youtube. Vill Spaass!
