Si tacuisses…Nr 2 

Bäino 60000 Leit hu bannent 16 Stonnen mäin Artikel iwwer den Optrëtt vum Staatsminister Xavier Bettel gelies! Dat ass erstaunlech, well de  “gkonline” réischt zanter 3 Wochen online ass. Et weist awer zwou Saachen: et mécht een net den Uuz matt de Suerge vun de Leit an anererwäerts weist et, wéi grouss d’Suerge sinn vun de Leit, sech een eegent Doheem kënnen unzeschafen an dobäi nach eenegermoosse liewen ze kënnen!

Ech hat jo nëmmen een eenzegt Beispill genannt, vun enger Fra, monoparentale, déi den onqualifizéierte Mindestloun huet. D’Problematik muss een allerdéngs nach méi breedgefächert gesinn: och e Jonggesell mam qualifizéierte Mindestlouhn deet sech méi wéi schwéier, aus där Féckmillchen erauszekommen, jo och eng Persoun, déi 3000 € brutto de Mount huet, ka sech bal näischt op d’Säit leeën, fir eventuell e klenge prêt vun der Bank accordéiert ze kréien, fir sech mat maximal 200.000 € e klenge Studio leeschte ze kënnen.Et sinn déi betraffe Leit selwer, déi sech grouss Gedanke maachen, an et sinn och deene Jonken hir Elteren, déi, wann se finanziell net kënnen hëllefen, mussen nokucken, wéi hir Kanner sech am Krees dréien,ouni déi geréngste Chance, aus där Nummer erauszekommen.

Et ass esou villes iwwer d’Problematik “logement” zu Lëtzebuerg ze schreiwen, wat ech haut net ka maachen, well ech an der Schivakanz sinn; noom ville Schnéi déi leschten Deeg kéint ech haut eng éischte Kéier op de Bierg. Schi Heil also. Ma ech kommen op d’Thematik zeréck. Meng éischt Erfahrung um Internet huet mir op eng krass Manéier virun Aa gefouert, wéi déif de Malaise an der lëtzebuerger Gesellschaft sétzt, an dee malaise sollt een eescht huelen, virun allem nattîirlech d’Politiker, a matt un der Spëtzt de Staatsminister.