Beim ablécklechen Abrëllswieder schéisst de Wues esou séier an d’Luucht wéi Spargelen. Ech war just fäerdeg mat Méien, wéi a menger Bréifkëscht um Laptop eng parlamentaresch Fro vun der CSV era geflattert koum. An zwar wëll den Deputéierten Laurent Mosar vu Lëtzebuerger Poliziste wëssen, déi zwar hei schaffen, ma an Däitschland wunnen, datt si vun den däitschen Autoritéiten ugeschriwwe goufen mat der Propose, si prioritär ze impfen!
Dat ass natierlech Waasser op d’Millen vun der Policegewerkschaft a vun der CGFP! Déi leschte Wochen hat d’Statsbeamtegewerkschaft dorobber gepocht an nach de Moien war de Romain Wolff op RTL der Meenung, déi Uniforméiert missten éischter vaccinéiert ginn wéi anerer. Vun der Regierung awer koum ëmmer e Refus. Elo steet si zimmlech domm do.
Ënnert de Poliziste selwer kann duerchaus Impfnäid entstoen. Déi däitsch Autoritéiten hunn ongewollt d’Regierung an d’Bredouille bruecht. Et däerf een op d’Äntwert vun de Ministere gespaant sinn, ma wann si méi ewéi e puer Deeg op sech waarde léisst, wëssen déi Uniforméiert Bescheed.
