Samschdes Moies, Véierel op 9: d’Leit zu Iechternoach waren nach net fäerdeg, hier Gebeesseschmier an de Kaffi ze zappen, wéi e gewaltege Kran ugerullt koum. An der rue de la Sûre – d’Sauergaass- sollt e Gebai aus dem vierechte Joerhonnert ofgerappt ginn. Fréier, ganz fréier war an deem Haus e Bistro, de Café Thill ewéi verschiddener wëlle wëssen. Ma zanter iwwer 50 Joer steet dat Haus eidel a gesäit dann och deementspriechend delabréiert aus.
Ass dat eng Ursaach fir ofzerappen? D’Ästhetik ka jo kee Grond sinn, well sos missten 90 Prozent vun den Neibauten ganz séier nees verschwannen. Et geet ëm de Fric, d’Zuel vun de Wunnechten multiplizéieren an deementspriechend och de Rendement! Nach viru 14
Deeg goufen d’Leit vun enger Petitioun iwwer déi desolat Situatioun gehéiert a wéi ëmmer: vertréischt. Dobäi hat de Facebook-Grupp under destruction expressis verbis vun dësem Haus an der Abteistad geschwat a virum imminenten Ofrëss gewarnt.
Den 13. Mee sollt et dann esou wäit sinn. Eng spezialiséiert Gesellschaft koum mat schwéierer Maschinerie ugeréckelt; nach deen nämmlechten Dag sollt d’Haus ofgerappt sinn. Eng Geschicht wou nees eng Kéier d’Gemidder héichkachen, mat Emotiounen tëscht Trauer, Nostalgie a Roserei. De Marc Thoma huet dëse Sujet opgegraff an dorausser dëse Video-Reportage gemaach.
Dëse Video-Reportage ass och op apart.tv ze gesinn
