5Joer schonn schleeft eng Ausernanersetzung tëscht engem belschen Investisseur an enger grousser Assurancëgesellschaft zu Lëtzebuerg. Fir den Detail verweisen ech ob mäin Artikel zejoert https://guykaiser.lu/aus-dem-courrier-vum-pierre-gramegna/ Et trëfft keen Aarmen, seet sech de Bierger Lambda, dee grad a Corona-Zäiten aner Suergen huet. Ma opgepasst. Et gëtt och e politesche volet.
Et geet Investor Protection – eng Zort Konsumenteschutz fir räich Leit- ëm 2 Fonctionnairen, déi méiglecherweis kéinten responsabel sinn fir en Delikt. Dat ze tranchéieren, läit un der Justiz, déi allerdéngs nach net mat der Affär befaasst gouf. Déi zwee Fonctionnairen stinn ënnert der Tutelle vum Finanzminister an hien misst op der Basis vum Artikel 23.(2) aus dem code de procédure pénale ouni laang ze zécken mat engem Avis bei de Procureur goen.
Dat awer huet den Här Gramegna bis dato net gemaach, obwuel hien an deem Sënn dräimol e recommandéierte Bréif- mat Copie un de Staatsminister- krut, an deem all Kéiers d’Beschëllegung dra stoung, datt hien d’Gesetz net respektéiert. Eng uerg Accusatioun! Sollt si net stëmmen, kéint de Minister de scribe vun deene Bréiwer wéinst Diffamatioun op d’Geriicht huelen. Hie kéint zugläich berouegt den Dossier un d’Justiz weiderginn, mat der Gewëssheet, datt d’Saach zimmlech séier klasséiert gëtt.
de Staatsminister krut och Courrier aus der Belsch, fir hien op dat Verhalen vu sengem Finanzminister opmierksam ze maachen. Eng éischte Kéier den 22. Mee dëst Joer. Keng Äntwert. Bon, et war Corona-Zäit. Rappel den 1. Juli, mat Copie un de Grand-Duc an un déi ganz Regierung. Schweigen im Walde! A schliisslech nach ganz rezent, den 26. Oktober e weidert Schreiwes, a Form vun engem oppene Bréif
Eng heavy Beschëllegung, wou keen et fir néideg fënnt, sech dogéint ze wieren?
Dobäi missten d’Hären Bettel a Gramegna et besser wëssen. Réischt kierzlech gouf et e klengen Techtelmechtel tëscht Bettel a Mosar an der Chamber: den CSV-Vertrieder huet erkläert, datt et am Fall vun der Jughurtfabréck FAGE seng Flicht war, en eventuelle Fall vu Blanchiment ze denoncéieren. D’Gesetz gesäit effektiv vir, datt bei gewëssene Kenntnisser ee vun den dräi pouvoiren engem anere pouvoir déi Informatiounen muss weiderginn. Hei also den Exekutif un d’Justiz.
… Dat huet e schéinen Numm: séparation des pouvoirs!..
Et ass nëmmen esou, wéi eng Demokratie kann fonctionéieren. De Montesquieu huet et esou geschriwwen: “Pour qu’on ne puisse pas abuser du pouvoir, il faut que, par la disposition des choses, le pouvoir arrête le pouvoir.” Probéiert d’Regierung hei de längeren Otem ze hunn? Investor Protection schéngt net gewëllt ze sinn, d’Bengelen bei d’Tromm ze geheien.
Eng gutt Reklamm fir d’Finanzplaz ass et och net grad.
