Op de Steierfroen wëlle vill vun den europäesche Memberlänner hir Souveränitéit net verléieren, dorënner Lëtzebuerg. De Finanzminister huet an engem Artikel vum LW(23.01) keen Zweiwel dru gelooss, datt hie sech géint d’europäesch Kommissioun wäert wieren, fir an steierleche Froen de Prinzip vun der Unanimitéit opzeginn. Seng Partei war iwwregens déi eenzeg, déi dëse Punkt mat an de Wahlprogramm opgeholl hat; aus verständleche Grënn: sollten Decisiounen a Punkto Steieren mat der qualifizéierter Majoritéit kënne geholl ginn, ass de Risk fir de Grand-Duché grouss, engesdaags ënnergebottert ze ginn.
De Journalist Diego Velazquez weist zurecht drop hinn, datt et an där Fro an der Dräierkoalitioun och net grad Unanimitéit gëtt. Fir déi Gréng geet d’Propositioun vun der Kommissioun zu Bréissel esouguer net wäit genuch. A ville Beräicher sollt de Prinzip faale gelooss gin, datt Decisiounen just an der Eestëmmegkeet kënne geholl ginn, well am anere Fall kéim d’Europäesch Unioun net vun der Plaz.
An de fuschneien LSAP-Parteipresident Franz Fayot dreemt vu Steiergerechtechkeet a plädéiert dofir och, datt an Zukunft Decisiounen per Majoritéit sollte geholl ginn. Lëtzebuerg misst besonnesch ambitionnéiert sinn a sech oppe weisen. Et géing kee Sënn maachen, drop ze waarden, datt déi ganz Welt (aalt Argument vu Juncker a Frieden) sech géing a Richtung Steiergerechtechkeet beweegen.
Et ass normal, datt et an enger Koalitioun Meenungsverschiddenheete gëtt. Hei ass allerdéngs e kruziale Punkt fir d’Land. Esou Divergenzen op d’place publique erausdroen, ass eng Bauzegkeet, wou déi Rout an déi Gréng um Enn dach wäerte musse kleng bäiginn.Et wär also wichteg, wa sech hei déi dräi Koalitionären géingen huerteg eens ginn….an der Unanimitéit!
