15Minutten nodeem am Venezuela sech de Parlamentspresident Guaidò selwer zum neien Iwwergangspresident erkläert huet, koum vun amerikanescher Säit di voll politesch Ënnerstëtzung! No wat richt dat? No faulen Eeër, op d’mannst no enger Ofsprooch tëscht deenen zwou Säiten. Well de Guaidò hätt sécherlech net de Courage gehaat, sech zum groussen Oppositiounsleader vis-à-vis vum Nachpresident Maduro opzespillen. An hie gouf den USA mat Sécherheet dat eent oder aanert Verspriechen…och Petrol richt!
De Lëtzebuerger Ausseminister huet sech no e bësselchen Zëcken am Ufank relativ séier op d’Säit vun deenen europäesche Länner geschloen, déi grad ewéi d’Amerikaner de Guaidò
ënnerstëtzen. Dat ass alles aaneschters ewéi glécklech! Den Ausseminister gëtt jo och nach de Chef vun der Diplomatie genannt…trëfft dat hei zou? Op kee Fall! Wee reecht sech dann ëmmer op, wann de béise Russ sech an d’Ugeleegenheeten vun anere Länner amësche geet? Natiirlech d’AMIS, awer och d’Länner aus der europäescher Unioun. An elo maache mir dat nämmlecht, oder wéinstens zur Halschecht, well et ginn europäesch Natiounen, déi wieren sech géint d’Ënnerstëtzung vun der amerikanescher Politik, wéi zum Beispill Italien oder Griichenland, ma do si jo souwisou Gelungener um Rudder.
Kloer, de Maduro ass kee Gudden, huet op d’mannst extreem vill politesch Feeler gemaach, an d’Konsequenzen dofunner kritt d’Vollek auszesippen! A grad esou kloer: de Russ huet schonn am Venezuela op Buedem opgeschloen an ënnerstëtzt mat China, dem Iran an der Tiirkei de Maduro-Regimm. Et geet ëm vill: d’Leit sinn zwar mausaarem, ma d’Land ass superräich. An elo schécke mir Iesswueren dohinner, déi de Maduro net einfach esou kann iwwer d’Grenze fuere loossen. Well, mécht hien dat, gëtt hien d’Faillite vu sengem Regime zou; mécht hien et net, kënne mir hien un de Pranger stellen a soen:”gesidd Dir? Hie léisst säi Vollek ausbludden, et ass e Säckdréier!” Elo schonn ass d’Situatioun am Venezuela no un engem Biergerkrich, et muss ee jo net de Fixspoun am Grapp hunn, fir d’Saach zum Explodéieren ze bréngen. Et geet scho wäit, wann europäesch Länner wéi Däitschland, Groussbritannien, Spuenien a Frankräich dem Maduro en Ultimatum stellen. Dee Maduro huet extreem vill Feinden, ma och vill Symphatisanten; sech also esou däitlech ze positionnéieren, wéi Lëtzebuerg dat gemaach huet, bedeit näischt aneschters, ewéi zu enger zousätzlecher Konfrontatioun bäizedroen
Ech droen déi dote Positioun op kee Fall mat!
