Et heescht, et wier dach esou einfach, gesond ze liewen. Net fëmmen, keen Alkohol drénken, net ze vill schaffen, sech virun allem net op der Aarbecht opreegen, vill spadséiere goen an Owes sech fréi an d’Bett leeën. Perfekt fir gesond al ze ginn, mat dat ass eng Siicht vum Liewen, déi schwéier op Groussstied zouzeschneideren ass. Paräis zum Beispill gëllt als Spelunk, als Hell, an där fréi gestuerwe gëtt: de ganzen Dag mat dausende vu Leit duerch d’Metro-Tunnelle schwammen, tëschenduerch 6 Expresso erofkippen, iwwer dem Trëppelen e Sandwich am Mond massakréieren a reegelméisseg manner wéi 8 Stonne schlofen. Dat kann net gutt ausgoen! Dat hält kee Mënsch laang aus!
Gewëss! Et ass zum Deel eng Saach vum eegenen Temperament. Grad esou gewëss! De Paräisser gesäit munchmol aus ewéi dem Doud säi Reesender. D’Liewen an der Capitale de la France ass haart, besonnesch fir déi ënnescht Schichten! Mä ass et wierklech esou, datt d’Liewen zu Paräis manner gesond ass? D’Statistike schwätzen eng däitlech a virun allem eng aner Sprooch.
A ganz Frankräich ginn d’Leit am Schnëtt 82,4 Joer al, d’Fraen esouguer 85 Joer. Identesch Situatioun zu Lëtzebuerg mat enger Moyenne vun 82,4 Joer, woubäi de Mann just op 80 Joer kënnt. D’Liewenserwaardung zu Paräis? Dann haalt ech un! D’Männer kommen op 81,1 Joer an d’Fraen op 86,2 Joer, 14 Méint méi ewéi am gesamten Hexagon fir dat weiblecht Geschlecht. Wien hätt dat geduecht? Zu Paräis gëtt op jidder Fall net massiv gestuerwen ewéi duerch Pescht a Cholera.
An déi, déi esou vill vu Gesondheet priedegen, den homo teutonicus? Schappeg Moyenne vun 80,7 Joer, esouguer ënner der Moyenne vun der Liewenserwaardung an der Euro-Zon. Iergend eng Interpretatioun. vun deenen Zuelen? Absolutt net. Ma d’Gesondheet op d’Formule reduzéieren:
Zitroun plus Olivenueleg = laangt Liewen
ass wuel dach e bësselche minimalistesch. Da villäicht Vëlofueren? Ass zwar geféierlech, ma mécht Spaass. Och gutt fir d’Gesondheet? An Holland fueren se vill op de Fiitsen, ma d’Liewenserwaardung läit onspektakulär bei 82 Joer. Allgemeng vill beweegen? Also net nëmme lafen, ma trëppelen, am Gaart schaffen asw? Do hätt allemol de Paräisser d’Nues vir: eleng an der Metro’s-Welt mécht de Mënsch um Wee fir op d’Aarbecht Kilometeren. Gesond Iessen? Ass VEGAN d’Léisung oder louch éischter d’Boma richteg mat hirer vun-allem-e-bësselche-Priedegt?
D’Weltgesondheetsorganisatioun huet déi heiten Definitioun vu gesond -sinn: Gesundheit ist ein Zustand vollkommenen physischen, geistigen und sozialen Wohlbefindens und nicht bloß das Fehlen von Krankheit und Gebrechen. An anere Wieder, et soll een sech esou richteg wuel fillen a senger Haut! Mä geet gesond -sinn duer, fir al ze ginn? Do dréie mir eis wuel am Krees a kommen net richteg weider.
Fakt ass, datt den Thema eis begeeschtert. Nëmmen net dës Welt ze fréi verloossen! Mir behuelen eis ewéi frësch-Verléifter, et geet eis ni duer, mir wëllen ëmmer nach e leschten Tour mat danzen. An esou ass et net verwonnerlech, datt an Däitschland de Bierger fir d’Gesondheet pro Joer 5939 Euro ausgëtt. E business vun am Ganzen 497,7 Milliarden. Eng Crème fir d’Madamm déi op den Altersfalen ewéi Tippex wierkt, e Spray fir den Här dee mat 70 Joer am Bett d’Nuecht duerch bis an de Kentucky ka reiden.
Fir jiddereen ass eppes derbäi fir gesond ze stierwen!
