Klimbim vu Fraenorganisatiounen 

Verschidde Fraen krute Schaum virun de Mond. Si reegen sech op wéinst enger Reklamm fir alkoholfräie Béier mat ze vill Stereotyppen, am Genre: de Mann gëtt mat Muskele gewisen, d’Fra mat Lëppestëft a gefierfte Fangerneel. U sech ginn ech deenen Damme Recht: d’Fra gëtt ëmmer nach reegelméisseg als Objet vun der Begier vermaart, wouduerjer de Mann automatesch an d’Roll gedréckt gëtt, permanent als spatzen Hunn op der Juegd no neie Pëllen ze sinn. Mä Hand op d’Häerz: et ass e Schiki-Miki-Problem, op d’mannst am Verglach mat der Situatioun vun de Fraen am Iran. Do awer, zanter Joren, Schweigen der Lämmer!

Hei kuerz d’Geschicht vun enger emanzipéierter Influencerin am Iran, am Alter tëscht Meedchen a jonker Fra. Si huet sech an de Videoen op de soziale Medien ouni Kappbedeckung gewisen. Een handfeste Skandal an deem Land. Dobäi sinn d’Hoer och nach blond gefierft. Frevel! Gotteslästerung! D’Mullah sinn ausser sech. An d’Fra weist sech an deene verschiddenste Kleeder, mol an engem laange Rack, mol an enger weiter Box; si fierft sech d’Guckelcher an d’Lëpsen, si fiert mam Pinsel iwwer d’Fangerneel.

Kuerz: si setzt sech an fir Saachen – weiblecht Geméchels?- déi vum Mullah-Regimm verbuede sinn  an déi mir zu Lëtzebuerg als Sexismus an d’Verbannung schécken. D’Mullah hunn net laang gezéckt: d’Meedchen krut vun hannen eng Kugel an de Kapp geschoss.

Ech wëll mech net an d’ligne éditoriale vun de Fraenorganisatiounen amëschen – a scho guer net als Vertrieder vum Penis-Geschlecht-, mä ech fannen et blamabel- an do bleiwen ech nach héiflech- iwwer banal Biller vu Béier hierzefalen, grad zu engem Ablack wou d’Liewen vun dausende Fraen am Iran um Spill steet. Ma d’Haaptsaach ass, et gëtt iwwer ee geschwat; esou gesinn huet de Béierproduzent gewonnen: eng herrlech Reklamm fir eng Publicitéit!