Tëscht Russland an Europa leeft den Ament e Wirtschaftskrich. Besonnesch eisen däitschen Noper ass do an enger Hexekichen. Zanter virgëschter liwwert Gazprom nach just 20 Prozent u Gas, an dat geet der Industrienatioun bei wäitem net duer. Datt grad Däitschland sech an déi komplett Ofhängegkeet vu Russland a Saachen Energie hat dreiwe gelooss, erweist sech elo als kapitale Feeler. Derbäi kënnt d’Diskussioun ëm den Atom.
An der Bundesrepublik ginn et just nach dräi där Zentralen. Déi sollten u sech an den nächste Méint och zougemaach ginn. Elo awer – bedéngt duerch de Krich an der Ukrain- leeft eng Diskussioun iwwer eng eventuell BETRIBS-Verlängerung. Nach sinn déi Gréng an Däitschland kategoresch dogéint, aneschters d’Ekologisten an der Belsch an a Finnland déi sech fir d’Atomenergie ëmdecidéiert hunn. D’Situatioun zu Lëtzebuerg? Wéi ëmmer: still ruht die See!
Dobäi gouf et viru ronn 50 Joer och bei eis eng hefteg Diskussioun iwwer den Atom. Fir d’éischt hat sech eng CSV-LSAP-Regierung an de Kapp gesat, esou eng Atomzentral zu Rëmerschen bauen ze loossen. A wéi et zu engem Regierungswiessel koum, nämlech zu enger DP-LSAP-Koalitioun – déi éischt Regierung zanter dem Krich ouni CSV!- gouf de Match kontroverse tëscht de Regierungsparteien ausgedroen; an der DP goufen et Leit wéi den deemoolege Wirtschaftsminister Marcel Maart, déi éischter positiv zum Atom agestallt waren, an der LSAP war een éischter géint esou en Atomwierk. Zousätzlech koum et zu massive Protester aus der Populatioun, déi schliisslech dozou gefouert haten, datt d’Regierung de Projet zeréckgezunn huet. Ganz aktiv géint de Projet war d’Famill Kox. Quasi den Dag no der politescher Decisioun am Grand-Duché hunn d’Fransousen de Projet Cattenom op den Dësch geluecht. Fir mech perséinlech deemools eng wichteg Lektioun als Jonken um Wee an d’Realpolitik.
Ëm Rëmerschen goung et am Marc Thoma sengem Reportage op apart TV. Hien huet en Interview gemaach mam jonken Historiker Sascha Pulli, dee seng Ofschlossaarbecht am Master ebe grad iwwer d’Geschicht vun där Atomzentral made in Luxembourg geschriwwen huet: “Das gescheiterte Jahrhunderprojekt”. Grad an dësen Zäiten top aktuell.
Vill Freed mam Video vum Marc Thoma. A wéi ëmmer, et däerf kontroverse diskutéiert a kommentéiert ginn.
Jo kloer, bei onseren Noperen déi Säit der Musel ass den Ament dëcken Damp an der Kichen. Mä déi hun sie sech mam falschen Éiergäiz an der politischer Novizität vun enger Frau Baerbock an engem Herr Habeck selwer gerappt. Wéi kann een nëmmen esou naiv sin, an sämtlech Eeër an een Kuerf leeën, resp. juste bei een Eenzegen akaafen goen an seng Wueren, schwätz Gas, iwwer dausenden vun Kilometer duerch friem Länner ze transportéieren – do kann vill geschéien.
Virun Nord Stream 1 huet sech déi al Pipeline duerch Weissrussland an d’Ukraine geschlängelt wou et öfters zu Querelen wéinst illegal ofgezaptem Gas gin ass. 2009 huet d’Ukraine wochenlang de Krunn zougedréint resp. eng entsprechent Transitmaut gefrot. Rou ass agekéiert wéi 2011 Nord Stream 1 ageweit gin ass, déi duerch d’Ostsee direkt an Däitschland féiert.
Elo huet dann eng Frau Baerbock gemengt, wann sie den Liwwervertrag mat Russland géif boykottéieren, resp. sanctionéieren, géif den Här Putin virun hir an d’Knéien goen an seng Zaldoten aus der Ukraine nees an d’Kasären ruffen. Tjo, domm gangen… elo stin “die Grünen” zimlech bepisst do, an hun keen Plang “B” méi, well sie hir AKW’s quasi all ofgeschalt hun. Et wär besser gewiescht sie hätten se laafen geloss an selwer hir Energieversorgung an d’Hand gehol. Et kann een mat Recht behaapten, dass d’Regierungsmitglieder hiren Eed gebrach hun fir “Schaden vom deutschen Volk abzuwenden und alles zu tun, dem deutschen Volk nicht zu schaden”.
Ënnert deenen aktuellen politeschen Virzeechen, sin ech der Meenung, dass d’lëtzebuerger Regierung 1977 ee Fehler gemat huet fir de Projet AKW-Remerschen komplett den Franzousen ze iwwerloosen, déi dorausser d’Centrale nucléaire Cattenom gemat hun.