Virun zwou Wochen huet d’Procureure générale Martine Solovieff der Chamber en aussergewéinleche Bréif zoukomme gelooss, mat der demande en accusation vun der Ëmweltministesch Carole Dieschbourg. Ausleefer vun der Affär Gaardenhaischen, déi wuel éischter eng Affär Traversini war. Den Dossier louch 30 Méint um Parquet a krut also mat där Prozedur vun enger mise en accusation vun der Chamber aus een iwwerraschenden Dréi, mat uewen drop d’Demissioun vun der Ministesch.
Déi Prozedur bedeit näischt aneschters ewéi datt d’Chamber d’Roll vum Parquet soll iwwerhuelen. Eng cocasse Situatioun. De fréiere Procureur vun Dikrech mengt, deen zoustännegen Text hätt scho längstens misse geännert ginn. Ma elo ass et ze spéit. Ënner anerem doriwwer huet sech de Marc Thoma op apart tv mam Jean Bour ënnerhalen. En Interview vu ronn enger hallwer Stonn, wéi ëmmer, no apart.tv och op dëser Websäit ze kucken an ze lauschteren.
