Déi ganz Europäesch Unioun huet sech confinéiert, ass fir déi zweet Well vun der Pandemie am lockdown. Déi ganz Unioun? Neen! Ee Land resistéiert. Zu Lëtzebuerg geet d’Liewen gréisstendeels weider, wéi wann näischt wier. An dat huet enorm positiv Auswierkungen op eis Ekonomie.
Wourunner kee geduecht huet: mam lockdown an eisen Nopeschlänner, virun allem mat der schaarfer Ausgangsspär an der Belsch an a Frankräich kommen iwwer de Weekend d’Leit vun doiwwer fir eng Visite vun e puer Stonnen op Lëtzebuerg. On va faire un p’tit tour au Luxembourg une fois? Schonn fir den zweete Samschdeg hannerteneen konnten sech d’Geschäftsleit dem Akafsdrang vun den Auslänner kaum erwieren. Samschdeg am Nomëtten war d’Groussgaass schwaarz vu Leit. Och an den Akafsgalerien waren d’Geschäfter gutt gefëlt, et geet eben stramm op Chrëschtdag duer. An de Kleeschen nëmmen net vergiessen!
Grad esou wéineg kënnen sech Café a Restaurant beschwéieren. On a bien travaillé, heescht et vun der Plëss d’Arem, virun enger Stater Pizzeria stoungen se Schlaang. Esou eppes hat ech zanter Joer net méi gesinn. Wann dat esou unhält, sinn d’Perten aus dem Fréijoer zu engem Deel nees guttgemaach.
Wann, wann! Den Normal-Lëtzebuerger stellt sech d’Fro: wéini kënnt de lockdown och zu Lëtzebuerg? Oder ass alles fakenews, wat aus eiser Grenzregioun eriwwer kënnt? A well d’Belsch, d’Fransousen an déi Däitsch sech esou dichteg bei sech doheem infizéiert hunn, misst et just eng Fro vun der Zäit sinn, bis bei eis d’Zuel vun den Infektiounen an d’Luuchtt schéisst. Déi Zuel ass souwisou elo schonn guer net schlecht: héich gerechent op Frankräich hätte mir gëschter 55.000 Neiinfektioune gehat!
Dramatesch wär et, wann d’Situatioun sech géing an 10 Deeg zouspëtzen, mat engem gepefferten lockdown kuerz virun deene Feierdeeg. Dat wär fir Bettel a Co de Supergau! De Staatsminister pokert – zesummen mat der Gesondheetsministesch- also ganz héich. Geet alles riicht aus, seet de Commerce, soen Land a Leit him Merci. The winner takes it all! Geet et awer schiif aus, ass d’Roserei vum Vollek net ze bremsen. E lockdown am Dezember ass sech schwéier virzestellen, ëmsou méi, wou deen eventuell hätt kënne verhënnert ginn!
