sécher! D’Land huet den Ament aner Probleemer, ewéi sech ëm Sujetën wéi Dateschutz ze këmmeren. Aussergewéinlech Situatiounen verlaangen nun eemol aussergewéinlech Moossnahmen! Trotzdeem: d’Manéier, wéi mam Personal aus dem Gesondheetssecteur ëmgespronge gëtt, suergt fir onnéideg Onrou.
Fir d’éischt war et d’indélicatesse, datt d’Personal via d’Medien gewuer gouf, sech MUSSEN via de Portal https://govjobs.public.lu/fr/benevoles-covid-19/professionnels_sante.html anzeschreiwen als eng Réserve. Déi Initiative vun der Regierung ass duerchaus sënnvoll, well een – op d’mannst zu deem Ablack- net konnt wëssen, wéi sech d’Situatioun mat der Epidemie géing entwéckelen. Mä normal, datt déi betraffe Leit sech Froen gestallt haten, an esou huet d’Gesondheetsministesch Paulette Lenert op der Tele probéiert ze berouegen: dat wär falsch verstane ginn.
Keng 48 Stonnen drop huet déi nämmlecht Ministesch awer vun enger eventueller Zwangs- rekrutéierung geschwat via en arrêté grand-ducal. Schlussendlech krut d’Personal e Bréif aus der Santé, fir mattzedeelen, datt hir Donneeën weidergeleet goufen, an zwar an eng aner Datebank:
dat gëllt also och fir déi Leit, déi an der Pensioun sinn. E puer Froen gi mir duerch de Kapp: 1. Wéisou huet de Personalbureau vun engem Spidol nach d’Donneën vu Leit, déi schonn längstens am “passive Liewen” ukomm sinn? 2. Wat ass ënnert dem “etc” ze verstoen. Sinn domatter och gemengt d’Krankeschäiner, eventuell Krankheete selwer vun der Persoun, Disziplinarverfahren, Bewäertungen vum Virgesetzten…? 3. Ass esou eng Transmissioun vun enger Datebank an eng aner ouni den Accord vum Betraffenen legal? 4. Ass gekläert, ween iwwerhapt Zougang huet zu där Datebank?
Ech verstinn, datt een an der Hektik de Schwéierpunkt aneschters tässelt wéi an normalen Zäiten. Schliisslech war kee Land op der Welt op dës Pandemie virbereet. Mä, wär et net duergaangen, d’Leit hätten sech selwer op der Adress vun der Regierung gemelt? D’Gesondheetspersonal ass veronséchert an huet de Verdacht, et géing drëms goen, “schwaarz Schoof” ze fannen, déi sech net selwer mellen.
Et sollt een awer duerchaus no engem Rechtskader sichen. Mir sinn zwar an engem Krisenzoustand, ma nach fonktionnéiert eist Parlament: d’Ministeren sollen mat den Volleksvertrieder zesumme schaffen, och a virun allem, wat de spéideren Noutausgang betrëfft aus den ablacklechen wirtschaftlechen a gesellschaftleche Aschränkungen!
