Lëtzebuerg huet op quasi all den olympesche Summerspiller zanter 1912 matgemaach. D’Ausnam waren d’Spiller vu Los Angeles am Joer 1932. Aneschters gesäit et bei den olympesche Wanterspiller aus; d’Éisleker Koppe ginn eben net duer fir am déiwe Schnéi de Super G ze trainéieren. Do hate mir schonn op e Marc Girardelli musse waarden, dee quasi iwwer Nuecht Lëtzebuerger gi war an zwou Sëlwermedaile vun Albertville matbruecht hat. Op Wikipedia heescht et, datt de Grand-Duché bis ewell 465 Athleten op d’olympesch Spiller geschéckt huet, -Paräis net mat aberechent- an datt mir an där Zäit 4 Medaile konnte rafen.
Nieft deenen Zwou aus Sëlwer fir de Girardelli eng aus Gold fir de Josy Barthel am 1500 Meter-Laf an nach eng aus Sëlwer fir de Jos Alzin am Schwéiergewiicht, deen 1920 zu Amsterdam 260 Kilo gestemmt huet. 465 Athlete bannent 100 Joer, dat ass fir e klengt Land net esou schlecht. Och op Wikipedia hunn ech déi couragéiert Sportler fonnt, déi 1924 derbäi waren. Do staunt een! Et fënnt een esou guer Leit aus der eegener Familljen! D’Delegatioun bestoung aus 44 Sportler, dorënner just zwou Fraen. De Grand-Duché koum deemools am Foussball op déi respektabel 9. Plaz, gutt vertruede ware mir och am Turnen, an der Liichtathletik, am Boxen an um Vëlo. Hei ass de Link https://bit.ly/3WJd2Wf
