Affaire Rodrigues: rout Kaart fir d’Politik! 

D’Justiz huet geschwat: de Foussballer Gerson Rodrigues huet eng Fra geschloen. Eppes wat een absolutt net däerf. Feeler Nummer 1. De Feeler 2 läit doranner, datt hien sech dofir net richteg an net genuch an der Ëffentlechkeet entschëllegt huet. Normal also, datt verschidden Organisatiounen – virun allem Fraenorganisatiounen-géint dee Mann manifestéieren, probéieren, him d’Liewe sauer ze maachen: de Ball kann net méi einfach esou weiderrullen ewéi wann näischt geschitt wier.

Feeler Nummer 3: d’Foussballfederatioun hat grouss Kommunikatiounsproblemer, soudatt hir um Enn – fir d’Geeschter e bësselchen ze berouegen- näischt aneschters iwwereg blouf ewéi eng Ethik-Kommissioun aus dem Hutt ze zauberen. Schéin a gutt, ma ech froe mech ob elo déi aner Federatiounen, déi aner Sportarten mussen nozéien fir och esou eng Ethik-Kommissioun an d’Liewen ze ruffen? Muss dat wierklech sinn? Geet de gesonnte Mënscheverstand net duer?

Feeler Nummer 4: d’Politik huet sech an d’Affaire Rodrigues agemëscht. Aha! Dichteg, dichteg, Dir Dammen an Dir Hären Deputéierten: eng gutt Geleeënheet méi, sech an d’Broscht ze geheien a fir eng kuerz Zäit an der Dagesaktualitéit fir Opmierksamkeet heeschen ze goen. Wat eng Hypocrisie! Do ware Politiker um leschte Match an der business-lounge, hu sech ‘Schampes a Kaviar’ gutt schmaache gelooss an haten an der Poschettentäsch eng rout Kaart erausluussen. Wat e Protest! Entweder richteg oder guer näischt.

U sech misst d’Parlament eng zousätzlech Kommissioun an d’Liewe ruffen, an där decidéiert gëtt, bei wat fir enge Geleeënheeten sech d’Politik dann elo anzemëschen huet a wéini net. Iergendwéi grenzt et u Lächerlechkeet bis Topegkeet!. Ech waarden drop, datt am däitsche Bundestag oder an der franséischer assemblée nationale iwwer en nationale Foussballspiller, iwwer en 100-Meter-Leefer, iwwer eng Schwëmmerin asw diskutéiert a polemiséiert gëtt.Tëscht enger Debatt iwwer Brandmauer an enger anerer iwwer de Krich an der Ukrain nach séier eng Affaire Schweini oder Mbappé..Do géif ee sech mat der flaacher Hand un d’Stier klatschen, wuel verstanen un déi eegen!