Enn Abrëll zejoert zitéiert d’Publikatioun virgule.lu d’Waasserwirtschaftsamt, datt et zwar gutt gereent huet, mä datt et net duergeet fir d’Grondwaasserreserven opzefëllen.. Dobäi hat et gereent onënnerbrach zanter November 23! Maache mir eppes falsch? Solle mer net bis eriwwer an Tunesien oder Algerien luusse goen wéi déi et maachen? Esou Diskussioune provozéiere bei mir nawell gären eng Rétention urinaire! Bon, et koume gefillten 1000 Deeg décke Reen derbäi. Am Mee huet et geschott ewéi mat Eemeren: 176,5 Liter pro Quadratmeter; dat wor 2,5 méi ewéi den Duerchschnëtt déi lescht 30 Joer an deem Mount. 202405_résumé_mensuel_du_temps_mai_2024 Nach de 26. Juli koum Météolux mat der Warnung, datt bis zu 30 Liter um Metercarré kéinte gefall kommen, a mat der wichteger Präzisioun op rtl.lu: Lokal kommen do awer ganz ënnerschiddlech Quantitéiten zesummen, wéi Meteolux schreift. Et rechent ee mat 15 bis 25 Liter pro Metercarré. Dat kann awer och plazeweis eropgoen op 30 Liter. Dat erkläert sech doduerch, dass d’Intensitéit vum Reen ganz ënnerschiddlech ka sinn, jee nodeem wou am Land en eben erofkënnt. Potznennö! Datt een also de Krunn méi grouss opdréit, datt tatsächlech méi Waasser gestrutzt kënnt. Esou Feststellungen gehéieren an d’Geschichtsbicher!
Déi 12 Méint vum vergaangene Joer zesummegerechent: 1090,2 Liter Reen koumen op eis erofgefall, 258,7 Liter méi ewéi an den 30 Referenzjoer vun 1990 bis 2020. Eng Hausse vun 31 Prozent! Dat héiert sech no vill un an dat ass et och…et misst op alle Fall déck duergoen fir d’Buedemreserven gutt opgefëllt ze hunn. Souwisou geet an dëse Méint dat sabbelegt Wieder weider an et kéint an den nächsten Deeg esouguer e bësselche Schnéi gefall kommen. Sollt dëse Summer d’Waasser also tatsächlech nees knapp ginn, maache mir definitiv eppes falsch.
